ഉറുമി

കേരളത്തിലേക്ക് കടൽ കടന്ന് പോർച്ചുഗീസുകാർ എത്തിയ ചരിത്രം വിവരിച്ചു കൊണ്ടാണു ചിത്രം തുടങ്ങുന്നത്.

ചരിത്രത്തെ കുറിച്ചും സ്വന്തം മണ്ണിനെ കുറിച്ചും അവബോധമില്ലാത്ത കൃഷ്ണദാസ്, തന്റെ സുഹൃത്ത് ടാർസനുമൊത്ത് ഗോവയിൽ ഒരു ബിസിനസ് നടത്താൻ ശ്രമിക്കുകയാണ്. സാമ്പത്തികമായി ഏറെ ബാധ്യതകളുള്ള കൃഷ്ണദാസിനെ ഒരു ദിവസം നിർവ്വാണ എന്ന മൈനിംഗ് കമ്പനിക്കാർ വന്നു കാണുന്നു. കൃഷ്ണദാസിന്റെ കുടുംബസ്വത്ത് അയാളുടെ മുതുമുത്തച്ഛൻ ഒരു എൻ ജി ഓക്കായി സ്കൂൾ നടത്താൻ പാട്ടത്തിനു നൽകിയിരുന്നു. ധാതുക്കൾ അടങ്ങിയ മണലിനാൽ സമ്പുഷ്ടമായ ആ സ്ഥലത്ത് ഖനനം നടത്തുവാൻ നിർവാണ കമ്പനിക്കാർ സർക്കാരിൽ നിന്നും അനുമതി നേടിയിരുന്നു. എന്നാൽ എൻ ജി ഓയുടെ നടത്തിപ്പുകാരിയായ ഭൂമി അവരുടെ നീക്കത്തെ എതിർക്കുന്നു. കൃഷ്ണദാസിനെ സ്വാധീനിച്ച് വൻ തുക വാഗ്ദാനം ചെയ്തു സ്ഥലം കയ്യിലാക്കാം എന്ന പദ്ധതിയുമായാണ്‌ അവർ അവനെ കാണുന്നത്. കൃഷ്ണദാസും ടാർസനും കോഴിക്കോട്ടുള്ള അവന്റെ തറവാട്ട് നിലനിൽക്കുന്ന സ്ഥലത്ത് എത്തി ഭൂമിയെ കാണുന്നു. അവർ ഈ സ്ഥലം ചരിത്ര പ്രാധാന്യമുള്ളതാണെന്നും അതിലുപരി അവിടെ ഖനനം നടത്തുന്നത് അവിടുത്തെ പാരിസ്ഥിതികമായ വ്യവസ്ഥിതിയെ സാരമായി ബാധിക്കുമെന്നും പറഞ്ഞു അവനെ മനസ്സിലാക്കുവാൻ ശ്രമിക്കുന്നു. എന്നാൽ പണം മുന്നിൽ കാണുന്ന കൃഷ്ണദാസ് അതിനെ വക വയ്ക്കുന്നില്ല. അവിടെ നിന്നിറങ്ങുന്ന കൃഷ്ണദാസിനെയും ടാർസനേയും ഒരു സംഘം തട്ടിക്കൊണ്ട് പോയി, കാടിനകത്തെ ഒരു ഗുഹയിൽ എത്തിക്കുന്നു. അവിടെ വച്ച് അവരുടെ നേതാവ് തണ്ടത്താനെ അവർ കണ്ടുമുട്ടുന്നു. അവർ ചിറയ്ക്കൽ കേളു നയനാരുടെ പിൻതലമുറയാണെന്നു പറഞ്ഞ് പരിചയപ്പെടുത്തുന്ന തണ്ടത്താൻ, അവരോട് കേളു നയനാരുടെ കഥ പറയുന്നു.

16 ആം നൂറ്റാണ്ടിൽ കടലു കടന്നെത്തിയ വാസ്കോ ഡ ഗാമ, മക്കയിലേക്ക് പോകുകയായിരുന്ന ഒരു തീർത്ഥാടക കപ്പൽ പിടിച്ചെടുക്കുകയും അതിലെ യാത്രക്കാരെ തടവിലാക്കുകയും ചെയ്തു. ചിറയ്ക്കൽ നാട്ടുരാജ്യത്തിന്റെ പടത്തലവൻ ചിറയ്ക്കൽ കൊത്തുവാൾ, തന്റെ മകൻ കേളുവിനേയും ഒരു ബ്രാഹമണനേയും മധ്യസ്ഥതയ്ക്കായി ഗാമയുടെ അടുത്തേക്ക് അയക്കൂന്നു. എന്നാൽ ഗാമ ബ്രാഹമണന്റെ ചെവി മുറിച്ചെടുത്ത് നായക്കിട്ട് കൊടുക്കുകയും, പിടിച്ചെടുത്ത കപ്പലും അതിലെ ആളുകളേയും തീവെച്ച് കൊലപ്പെടുത്തുകയും ചെയ്യുന്നു. കേളുവിനെ കൊല്ലുന്നത്തിനു മുന്നേ, കൊത്തുവാൾ കപ്പലിലെത്തുന്നു. കേളു കടലിൽ ചാടി രക്ഷപ്പെടുന്നുവെങ്കിലും കൊത്തുവാൾ ആ കപ്പലിൽ വച്ച് കൊല്ലപ്പെടുന്നു. തീരത്ത് നീന്തിയടുക്കുന്ന കേളു കാണുന്നത് ഗാമ കൊന്ന തീർത്ഥാടകരുടെ ശവശരീരങ്ങളായിരുന്നു. അതിനിടയിൽ നിന്നും ലഭിക്കുന്ന സ്വർണ്ണ പണ്ടങ്ങൾ കൊണ്ട് കേളു ഒരു ഉറുമി പണിയുകയും വാസ്കോ ഡ ഗാമയെ വധിക്കുമെന്ന് പ്രതിജ്ഞ ചെയ്യുകയും ചെയ്തു.  അനാഥനായ കേളുവിനെ പിന്നീട് വളർത്തിയത് വവ്വാലി എന്ന തമിഴ് മുസ്ലീം ബാലന്റെ ഉമ്മയായിരുന്നു. അവർ അവനെ മകനെ പോലെ വളർത്തി. വവ്വാലിക്ക് അവൻ അനുജനും ആത്മസുഹൃത്തുമായിരുന്നു.

വളർന്നു വലുതാകുന്ന കേളുവും വവ്വാലിയും ആയോധന കലകൾ അഭ്യസിച്ച് മികവ നേടുന്നു. അവിചാരിതമായി അവർക്ക് ഒരിക്കൽ ചിറയ്ക്കൽ കൊട്ടാരത്തിലെ രാജകുമാരി, ചിറയ്ക്കൽ ബാലയെ ഒരു അപകടത്തിൽ നിന്നും രക്ഷിക്കേണ്ടി വരുന്നു. എന്നാൽ ചിറയ്ക്കൽ തമ്പുരാന്റെ അനന്തരവൻ ഭാനു വിക്രമൻ അവരെ ബാലയെ തട്ടിക്കൊണ്ട് പോകാൻ ശ്രമിച്ചു എന്ന് പറഞ്ഞു പിടി കൂടി തമ്പുരാന്റെ അടുത്ത് എത്തിക്കുന്നു. ബാല കാര്യങ്ങൾ തുറന്നു പറയുന്നതോടെ തമ്പുരാൻ അവരെ വിട്ടയക്കുന്നു. ഗാമയുമായി ശത്രുതയിലായിരുന്ന തമ്പുരാന്റെ മുന്നിൽ, അറയ്ക്കൽ ബലിഹസനെ വിചാരണ ചെയ്യാൻ വരുന്ന ഗാമയെ തങ്ങൾ പിടിക്കാമെന്ന് കേളു പറയുന്നു. തമ്പുരാൻ കേളുവിനു ആൾ ബലം നൽകുന്നു. ബലിഹസനെ തൂക്കിലേറ്റാൻ പക്ഷേ ഗാമയുടെ മകൻ എസ്താവോ ഡ ഗാമയാണ് വന്നത്. എസ്താവോയെ പിടികൂടാൻ കേളുവും വവ്വാലിയും ശ്രമിക്കുന്നതിനിടയിൽ, ബലിഹസനെ രക്ഷിക്കാൻ അറയ്ക്കൽ ആയിഷ ശ്രമിക്കുന്നു. അവർ എസ്താവോയെ പിടികൂടുന്നു. ചിറയ്ക്കലെ പടയാളികൾ അറയ്ക്കൽ ബീവിയെ കൊലപ്പെടുത്തുകയും അറയ്ക്കൽ ആയിഷയേയും മറ്റുള്ളവരേയും തടവിലാക്കുകയും ചെയ്യുന്നു. എസ്താവോയെ പിടിച്ചു കൊണ്ടുവരുന്ന കേളുവിനെ തമ്പുരാൻ ചിറയ്ക്കലെ പടനായകനായി വാഴിക്കുന്നു. ആയിഷയെ ഭാനു വിക്രമനു കാഴ്ച വയ്ക്കുന്നു. ആയിഷ ഭാനുവിനെ കൊല്ലാൻ ശ്രമിക്കുന്നുവെങ്കിലും കേളു അയാളെ രക്ഷിക്കുന്നു. പിന്നീട് ചിറയ്ക്കൽ കൊട്ടാരത്തിൽ നിന്നും ആയിഷയെ കേളു രക്ഷപ്പെടുത്തുന്നു. കേളുവിനെ പോലെ തന്നെ ഗാമയോട് അടങ്ങാത്ത വിരോധമുള്ള ആയിഷ, ഗാമക്കെതിരായ പോരാട്ടത്തിൽ കേളുവിനൊപ്പം ചേരാമെന്നു സമ്മതിക്കുന്നു. കേളു വിവിധ ദേശങ്ങളിൽ സഞ്ചരിച്ച് ഗാമക്കെതിരായ യുദ്ധത്തിനു ആളെ കൂട്ടുന്നു.