ഇഷ്ടപ്രാണേശ്വരീ

ഇഷ്ടപ്രാണേശ്വരീ - നിന്റെ
ഏദൻതോട്ടം എനിക്കു വേണ്ടി
ഏഴാംസ്വർഗ്ഗം എനിക്കു വേണ്ടി
(ഇഷ്ടപ്രാണേശ്വരീ...)

കുന്തിരിക്കം പുകയുന്ന കുന്നിൻചരുവിലെ
കുയിൽക്കിളീ - ഇണക്കുയിൽക്കിളി
നിങ്ങളുടെയിടയിൽ ആണിനോ പെണ്ണിനോ
നിയന്ത്രിക്കാനാവാത്ത പ്രണയദാഹം - ഒരിക്കലും
നിയന്ത്രിക്കാനാവാത്ത പ്രണയദാഹം
എന്നോടു പറയൂ നീ
എന്തെങ്കിലും ഒന്നു സമ്മതിക്കൂ
ഇഷ്ടപ്രാണേശ്വരീ

സ്വർണ്ണമേഘത്തുകിൽകൊണ്ടു നാണം മറയ്ക്കുന്ന
സുധാംഗദേ - സ്വർഗ്ഗസുധാംഗദേ
ആപ്രമദ വനത്തിൽ ആദവും ഹവ്വയും
അരുതെന്നു വിലക്കിയ കനി തിന്നുവോ - ഈശ്വരൻ
അരുതെന്നു വിലക്കിയ കനി തിന്നുവോ
എന്നോടു പറയൂ നീ
എന്തെങ്കിലും ഒന്നു സമ്മതിക്കൂ

ഇഷ്ടപ്രാണേശ്വരീ - നിന്റെ
ഏദൻതോട്ടം എനിക്കു വേണ്ടി
ഏഴാംസ്വർഗ്ഗം എനിക്കു വേണ്ടി
ഇഷ്ടപ്രാണേശ്വരീ...