പ്രാണവീണതൻ ലോലതന്ത്രിയിൽ

പ്രാണവീണതൻ ലോലതന്ത്രിയിൽ
ഗാനമായ് വിടർന്നു നീ
രാജമല്ലികൾ താലമേന്തിയ
രാഗഹേമന്ത സന്ധ്യയിൽ

സാന്ധ്യ താരക സംഗമത്തിന്റെ
ശാശ്വത സ്മൃതിയാകവേ
വാനദർപ്പണ വർണ്ണരാജികൾ
യാമിനിയെ പുണരവെ

പ്രാണസിന്ധുവിൽ പ്രേമലോലയാം
വേണിയായി ലയിച്ചു നീ
ഇന്ദ്രിയങ്ങളിലാത്മപൂജയാൽ
ഇന്ദ്രജാലങ്ങൾ കാട്ടി നീ

മാമലകളിൽ പൊൻപുലരിയിൽ
മഞ്ഞലയെന്ന പോലവേ
വാസരക്കുളിർതെന്നലിൽ പൂവിൻ
വാസനയെന്ന പോലവേ

നിദ്രയിൽ സ്വപ്നമെന്ന പോലവേ
നിർവൃതിയെന്ന പോലവേ
എന്നിലെയെന്നിൽ എന്റെ വേണുവിൽ
ഇന്നലിഞ്ഞു കഴിഞ്ഞു നീ

കല്പനയിൽ മഹാബലീപുര-
ശില്പഭംഗികൾ ചേർത്തു നീ
ചിന്തതൻ മലർവല്ലികകളിൽ
മുന്തിരിക്കുല ചാർത്തി നീ

അത്തലിന്റെ കയങ്ങളിൽ നിന്നും
മുത്തു വാരുവാൻ പോരുമോ
മന്ദഹാസ വസന്തരേഖയായ്
നന്ദിനീ രാഗനന്ദിനീ 

പ്രാണവീണതൻ ലോലതന്ത്രിയിൽ
ഗാനമായ് വിടർന്നു നീ
രാജമല്ലികൾ താലമേന്തിയ
രാഗഹേമന്ത സന്ധ്യയിൽ

നിങ്ങളുടെ പ്രിയഗാനങ്ങളിലേയ്ക്ക് ചേർക്കൂ: 
0
No votes yet
Praanaveenathan

Additional Info

Year: 
1970

അനുബന്ധവർത്തമാനം