ക്രിസ്റ്റഫർ

തൻ്റെ അയൽവീട്ടിൽ താമസിക്കുന്ന വിദ്യയേയും അനിയത്തി കവിതയേയും കാണാനില്ലെന്ന് ഒരു സ്ത്രീ രാത്രി പോലീസ് സ്റ്റേഷനിലെത്തി പരാതി പറയുന്നു. പരാതി കേൾക്കുന്നതിനിടയിൽ തന്നെ, വണ്ടിയിടിച്ച തകർന്ന നിലയിൽ വിദ്യയുടെ സ്കൂട്ടർ കണ്ടെത്തിയതായി SIക്ക് വിവരം ലഭിക്കുന്നു. അപകടസ്ഥലത്തു നിന്നും അകലെ ഒരു പൊന്തക്കാട്ടിൽ നിന്ന് ക്രൂരമായി ബലാൽസംഗം ചെയ്യപ്പെട്ട നിലയിൽ വിദ്യയുടെ മൃതദേഹം കിട്ടുന്നു. പിന്നീട്, ബലാൽസംഗത്തിനിരയായി ജീവച്ഛവമായ കവിതയേയും കണ്ടെത്തുന്നു. പൊതുജനങ്ങൾക്കിടയിൽ പ്രതിഷേധം കനത്തതിനെത്തുടർന്ന് ADGP ക്രിസ്റ്റഫറെ കേസന്വേഷണത്തിന് സർക്കാർ നിയമിക്കുന്നു. 

പോലീസ് സംഘം മുഖ്യപ്രതി സുധീർ രാജനെയും കൂട്ടാളികളെയും അറസ്റ്റ് ചെയ്യുന്നു, പ്രതികൾ കുറ്റം സമ്മതിച്ചതിനെത്തുടർന്ന് രാത്രിയിൽ അവരെ തെളിവെടുപ്പിന് കൊണ്ടു പോകുന്നു. ക്രിസ്റ്റഫറിൻ്റെ നിർദ്ദേശമനുസരിച്ച് പോലീസ് പ്രതികൾക്ക് ഓടി രക്ഷപ്പെടാൻ അവസരമുണ്ടാക്കുന്നു. രക്ഷപ്പെടാൻ ശ്രമിക്കുന്ന നാലു പേരെയും ക്രിസ്റ്റഫർ വെടിവച്ചു കൊല്ലുന്നു. പ്രതികളെ ശിക്ഷിച്ച ക്രിസ്റ്റഫർ  സോഷ്യൽ മീഡിയിലും പുറത്തും താരമാകുന്നു. എന്നാൽ വിവിധ മനുഷ്യാവകാശ സംഘടനകളുടെയും കോടതിയുടെയും  ഇടപെടലിനെത്തുടർന്ന് ക്രിസ്റ്റഫർക്കെതിരെ സർക്കാർ വകുപ്പുതല അന്വേഷണം പ്രഖ്യാപിക്കുന്നു. ക്രിസ്റ്റഫർ അവധിയിൽ പ്രവേശിക്കുന്നു. SP സുലേഖയ്ക്കാണ് അന്വേഷണച്ചുമതല. ക്രിസ്റ്റഫറുടെ ഭൂതകാലം അവർക്കു മുന്നിൽ പലരുടെയും വിവരണങ്ങളിലൂടെ തെളിയുന്നു.

നാല്പതു വർഷങ്ങൾക്കു മുൻപ്, വടക്കൻ കേരളത്തിൽ ഒരു വർഗീയ കലാപം അരങ്ങേറുന്നു. അതിനിടയിൽ രണ്ടു യുവാക്കൾ ഒരു വീട്ടിൽ കയറി അമ്മയെയും മകളെയും ബലാൽസംഗം ചെയ്യുന്നു; അവിടെയെത്തുന്ന ഗൃഹനാഥനെ അടിച്ചു കൊന്നിട്ട് മൂന്നു പേരെയും വീട്ടിനകത്തിട്ട് വീട് കത്തിക്കുന്നു. വീട്ടിലെത്തുന്ന പതിന്നാലുകാരൻ ക്രിസ്റ്റഫർ കാണുന്നത് തീ പടർന്ന വീട്ടിൽ എരിഞ്ഞു തീരുന്ന മാതാപിതാക്കളെയും സഹോദരിയെയുമാണ്.  ഒന്നുമറിയാത്ത പോലെ കലാപത്തിൽ വീടു നഷ്ടപ്പെട്ടവർക്കുള്ള  ക്യാമ്പിലെത്തിയ യുവാക്കളെ പിന്തുടർന്നെത്തുന്ന ക്രിസ്റ്റഫർ  അവരെ കൊല്ലാൻ ശ്രമിക്കുന്നു. അവിടെയുള്ള SP വെട്രിവേൽ അവനെ പിന്തിരിപ്പിച്ച് കാര്യം തിരക്കുന്നു. സംഭവങ്ങളുടെ നിജസ്ഥിതി മനസ്സിലാക്കിയ SP രണ്ടു യുവാക്കളെയും വെടിവച്ചു കൊല്ലുന്നു. ക്രിസ്റ്റഫറിന് അതൊരു പുതിയ പ്രചോദനമായിരുന്നു - കുറ്റവാളികളെ നേരിടുന്ന പൊലീസ് ആകാനുള്ള പ്രചോദനം. അനാഥനായ ക്രിസ്റ്റഫറെ വെട്രിവേൽ തനിക്കൊപ്പം കൂട്ടുന്നു. കാലക്രമത്തിൽ ക്രിസ്റ്റഫർ IPS ഉദ്യോഗസ്ഥനായി പോലീസ് സേനയിൽ എത്തുന്നു.

പോണ്ടിച്ചേരിലെ ഒരു ഹൈവേ കൊള്ളസംഘത്തെ പിടികൂടാൻ ക്രിസ്റ്റഫറെ നിയോഗിക്കുന്നു. അവിടെ വച്ചാണ്, പിന്നീട് തൻ്റെ ഭാര്യയായിത്തീർന്ന, ഡിസ്ട്രിക്ട് കളക്ടർ ബീന മറിയം ചാക്കോയെ  ക്രിസ്റ്റഫർ പരിചയപ്പെടുന്നത്. കൊള്ളക്കാരെ ക്രിസ്റ്റഫറും സംഘവും പിടികൂടുന്നു. എന്നാൽ ആ ഓപ്പറേഷനിടയിൽ ക്രിസ്റ്റഫറുടെ  അസിസ്റ്റൻ്റായ ഇസ്മയിൽ കൊല്ലപ്പെടുന്നു. ഇസ്മയിലിൻ്റെ ശവസംസ്കാരച്ചടങ്ങിൽ പങ്കെടുക്കുന്ന ക്രിസ്റ്റഫർ അയാളുടെ അനാഥയായ മകൾ ആമിനയെ കൂടെക്കൂട്ടുന്നു. തുടർന്ന്, ക്രിസ്റ്റഫറിനെ  ബീന വിവാഹം കഴിക്കുന്നു. 

പക്ഷേ, കാര്യങ്ങൾ പന്തിയല്ലാതാകുന്നത് ബീനയുടെ സഹോദരൻ സെബാസ്റ്റ്യൻ ഒരു കൊക്കൈൻ പാർട്ടി ഹോസ്റ്റ് ചെയ്യുന്നതോടെയാണ്. SP അഭിലാഷിൻ്റെ സഹായത്തോടെ ആ കേസ് ബീനയും, അവരുടെ അപ്പനും എം പിയുമായ  ചാക്കോച്ചനും ചേർന്ന് ഒതുക്കുന്നു. അത് ക്രിസ്റ്റഫർക്ക് ഒട്ടും ഇഷ്ടപ്പെടുന്നില്ല. മാസങ്ങൾക്കു ശേഷം,  ലോക്കൽ പോലീസ് അന്വേഷിച്ചിട്ടും തുമ്പുണ്ടാക്കാൻ കഴിയാത്ത, മൂന്നു പെൺകുട്ടികളുടെ തിരോധാനത്തിൻ്റെ അന്വേഷണം ക്രൈംബ്രാഞ്ച് SPയായ ക്രിസ്റ്റഫർ ഏറ്റെടുക്കുന്നു. അന്വേഷണം ചെന്നു നില്ക്കുന്നത് സെബാസ്റ്റ്യനിലാണ്. മയക്കുമരുന്നിനടിമയായ സെബാസ്റ്റ്യൻ കുട്ടികളെ മെറ്റൽ ക്രഷറിലിട്ട് കൊന്നതാണെന്ന്  കണ്ടെത്തിയതിനെത്തുടർന്ന്  അയാളെ ക്രിസ്റ്റഫർ അറസ്റ്റ് ചെയ്യുന്നു. അതിനെത്തുടർന്ന് ചാക്കോച്ചനും ക്രിസ്റ്റഫറും തെറ്റുന്നു. കോടതിയിലേക്ക് കൊണ്ടു പോകുന്ന സെബാസ്റ്റ്യനു നേരെ' മരിച്ച പെൺകുട്ടികളിൽ ഒരാളുടെ അമ്മ ഓടിച്ചെല്ലുന്നു. പ്രത്യാക്രമണം നടത്തുന്ന സെബാസ്റ്റ്യൻ പോലീസുകാരൻ്റെ തോക്കുപിടിച്ചുവാങ്ങി  ആ സ്ത്രീയെ അടിക്കാൻ അടുക്കുന്നു. ആ അവസരം പഴുതാക്കി ക്രിസ്റ്റഫർ അയാളെ വെടിവച്ചു കൊല്ലുന്നു. തുടർന്ന്, ബീന ക്രിസ്റ്റഫറിൽ നിന്ന് വിവാഹമോചനം നേടുന്നു. സെബാസ്റ്റ്യൻ കൊലക്കേസിൽ കേസിൽ കോടതി ക്രിസ്റ്റഫറെ കുറ്റവിമുക്തനാക്കുന്നു. തുടർന്നയാൾ സർവീസിൽ തിരിച്ചെത്തുന്നു. തുടർന്നാണ് വിദ്യാകൊലക്കേസിൽ ക്രിസ്റ്റഫർ പ്രതികളെ വെടിവച്ചു കൊല്ലുന്നതും  അയാൾക്കെതിരെ സർക്കാർ അന്വേഷണം വരുന്നതും.

അവധിയിലാണെങ്കിലും ക്രിസ്റ്റഫർ ഇപ്പോഴും സജീവമാണ്.  അയാളുടെ വളർത്തു പുത്രിയായ ആമിന ഇസ്മയിൽ വക്കീലും സാമൂഹികപ്രവർത്തകയുമാണ്.   പ്രസിദ്ധ ആയുർവേദമരുന്നു കമ്പനിയായ സൗഖ്യ ഗ്രൂപ്പിൻ്റെ MD സീതാറാം ത്രിമൂർത്തിയുടെ ഭാര്യ അശ്വിനി ആമിന യെക്കാണാൻ വരുന്നു. അവർക്ക് അയാളിൽ നിന്ന് വിവാഹമോചനം നേടണം.  തൻ്റെ ഭർത്താവ് ആയുർവേദ മരുന്നുകളുടെ മറവിൽ മയക്കുമരുന്നുകൾ വിദേശത്തേക്ക് കടത്തുന്നുണ്ടെന്നും തൻ്റെ അച്ഛനെ രഹസ്യമായി വകവരുത്തിയെന്നും അശ്വിനി പറയുന്നു.  ചില പ്രധാനപ്പെട്ട രേഖകളും അവർ ആമിനയ്ക്ക് നല്കുന്നു.  എന്നാൽ അതിന് ദിവസങ്ങൾക്കു ശേഷം അശ്വിനി കൊല്ലപ്പെടുന്നു. സീതാറാം തൻ്റെ സ്വാധീനമുപയോഗിച്ച്  അശ്വിനിയുടേത് തലച്ചോറിലെ രക്തസ്രാവം കാരണമുള്ള സ്വാഭാവിക മരണമാണെന്ന് വരുത്തിത്തീർക്കുന്നു.

ദിവസങ്ങൾക്കു ശേഷം മറയൂരിലേക്ക് പോയ ആമിനയെ പിറ്റേന്ന് രാവിലെ കൊല്ലപ്പെട്ട നിലയിൽ കണ്ടെത്തുന്നു. അതിക്രൂരമായി ബലാൽസംഗം ചെയ്ത ശേഷം കഴുത്തുഞെരിച്ചു കൊന്നതാണെന്നാണ്. പോസ്റ്റ്മോർട്ടം റിപ്പോർട്ട്.  കേസിൻ്റെ അന്വേഷണച്ചുമതല സുലേഖയ്ക്കാണെങ്കിലും ക്രിസ്റ്റഫർ സമാന്തരമായി അന്വേഷണം തുടങ്ങുന്നു. അഴിമതിക്കാരനെന്ന് കുപ്രസിദ്ധനായ DySP ജോർജ് കൊട്ടറയ്ക്കൻ സുലേഖയുടെ ടീമിലുള്ളത് ക്രിസ്റ്റഫറിനെ സംശയാലുവാക്കുന്നു. മറയൂരിലെത്തുന്ന ക്രിസ്റ്റഫർ, അവിടെ നിന്നു ലഭിക്കുന്ന സൂചനകളിൽ നിന്ന് മുനിയാണ്ടി എന്നൊരാളെ പിന്തുടരുന്നു. തമിഴ്നാട്ടിൽ വച്ച് അയാളെ പിടികൂടി പിന്നാലെയെത്തുന്ന സുലേഖയ്ക്ക് കൈമാറുന്നു. മുനിയാണ്ടിയുടെ കൈയിൽ നിന്ന് പത്തുലക്ഷം രൂപ കണ്ടെടുക്കുന്നു.

 മുനിയാണ്ടിയെ ഒരു കൃത്രിമ എൻകൗണ്ടർ ഓപ്പറേഷനിലൂടെ കൊല്ലാൻ കൊട്ടറയ്ക്കൻ ശ്രമിക്കുന്നു. എന്നാൽ അവിടെയെത്തുന്ന  ക്രിസ്റ്റഫർ  ആ ശ്രമം പരാജയപ്പെടുത്തി മുനിയാണ്ടിയെ തട്ടിക്കൊണ്ടു പോകുന്നു. കൊട്ടറയ്ക്കൻ സീതാറാമിൻ്റെ ആളാണെന്നും പാതാളം സുരേഷ് എന്നയാൾ വഴിയാണ് മുനിയാണ്ടിക്ക് പണം കൈമാറിയതെന്നും ക്രിസ്റ്റഫർ മുനിയാണ്ടി വഴി കണ്ടെത്തുന്നു. തുടർന്ന് അയാൾ മുനിയാണ്ടിയെ വകവരുത്തുന്നു.

സീതാറാമിൻ്റെ നിർദ്ദേശമനുസരിച്ച് കൊട്ടറയ്ക്കൻ പാതാളം സുരേഷിനെ കൊല്ലാൻ ശ്രമിക്കുന്നു. എന്നാൽ ക്രിസ്റ്റഫറിൻ്റെ വെടിയേറ്റ് കൊട്ടറയ്ക്കൻ കൊല്ലപ്പെടുന്നു. തന്നെ കൊല്ലാനുള്ള പദ്ധതി സീതാറാമിൻ്റെതാണെന്നു മനസ്സിലാക്കിയ സുരേഷ് അയാളെക്കൊല്ലാൻ ഹോട്ടലിലെത്തുന്നു. എന്നാൽ സീതാറാമിൻ്റെ വെടിയേറ്റ് സുരേഷ് കൊല്ലപ്പെടുന്നു. പിന്നാലെയെത്തുന്ന പോലീസ് സംഘം സീതാറാമിനെ കയ്യോടെ  പിടികൂടുന്നു.

സീതാറാം ഇപ്പോൾ തിരുവനന്തപുരം സെൻട്രൽ ജയിലിലാണ്. പോലീസിലെ ഉന്നതരുടെയും ജയിൽ സൂപ്രണ്ടിന്റെയും സഹായത്താൽ രാജകീയമായി കഴിയുകയാണയാൾ. ക്രിസ്റ്റഫറാണ് തന്നെ പൂട്ടിയതെന്ന്  അയാൾക്കറിയാം. ഇതിനിടയിൽ, ക്രിസ്റ്റഫറെ കുറ്റവിമുക്തനാക്കിക്കൊണ്ടുള്ള റിപ്പോർട്ട് സുലേഖ സമർപ്പിക്കുന്നു.  അതിനെത്തുടർന്ന് ക്രിസ്റ്റഫർ വീണ്ടും ADGPയായി സ്ഥാനമേൽക്കുന്നു. അതേ സമയം ജയിലിൽ സീതാറാം ക്രിസ്റ്റഫറിനെതിരെ കരുക്കൾ നീക്കുന്നു.