എല്ലാരും ചൊല്ലണ്

അനന്തപുരം ഗ്രാമത്തിൽ നിന്നും ഗൾഫിലേയ്ക്ക് പോയ ഏക വ്യക്തി രാമചന്ദ്രൻ(മുകേഷ് ) ആണ്. അത്കൊണ്ട് അവനിൽ പ്രതീക്ഷ അർപ്പിച്ച ചിലർ ആ നാട്ടിൽ ഉണ്ട്. മണി(മണിയൻ പിള്ള രാജു ) അതിൽ ഒരാൾ. നാട്ടിലെ ഏക വ്യവസായ സ്ഥാപനമായ അർച്ചന മിൽസിൽ ജോലി വാഗ്ദാനം ചെയ്ത് തൊഴിൽരഹിതരായ ചെറുപ്പിക്കാരിൽ നിന്നും കാശ് വാങ്ങി കടന്നു കളഞ്ഞ രാമചന്ദ്രന് വേണ്ടി ഗാരണ്ടി നൽകിയത് മണി ആണ്. ഇപ്പോൾ ആ ചെറുപ്പക്കാർ കാശിനു വേണ്ടി മണിയുടെ ജീവിതം ദുസ്സഹമാക്കി. രാമചന്ദ്രന്റെ കത്തും ഡ്രാഫ്റ്റും വരുമെന്ന് പറഞ്ഞ് കുറെ പിടിച്ചു നിന്നു എങ്കിലും ഇപ്പോൾ അതൊന്നും കേൾക്കാൻ ചെറുപ്പക്കാർ തയ്യാറല്ല. അത് കാരണം മണി നാട്ടിൽ പാത്തും പതുങ്ങിയും നടക്കുന്നു. അതേ അനുഭവം തന്നെയാണ് ദാസൂട്ടിക്കും(സായികുമാർ ). രാമചന്ദ്രന് വിസ ലഭിക്കാൻ വേണ്ടി പലിശക്കാരൻ മാത്തൂണ്ണി(പറവൂർ ഭരതൻ )യുടെ കയ്യിൽ നിന്നും പണം കടം വാങ്ങി കൊടുത്തു. ഇപ്പോൾ മുതലും ഇല്ല, പലിശയും ഇല്ല. മാത്തൂണ്ണി, ദാസൂട്ടിയുടെ വീട്ടിൽ പോയി ഒച്ച വയ്ക്കുന്നു. മണിയും ദാസൂട്ടിയും രാമചന്ദ്രന്റെ വീട്ടിൽ പോയി തിരക്കി. അവന്റെ അച്ഛൻ രാവുണ്ണി മേനോൻ (ഒടുവിൽ ഉണ്ണികൃഷ്ണൻ ), അമ്മ ( സുകുമാരി ) എന്നിവർക്ക്  മകനെക്കുറിച്ച് ഒരു വിവരവും ഇല്ല.

രാമചന്ദ്രൻ വാങ്ങിയ കടത്തിന് ഗാരണ്ടി നിന്നത് കാരണം സ്വസ്ഥത നഷ്ടപ്പെട്ട മണിയും ദാസൂട്ടിയും കൂടി തല്ക്കാലം രക്ഷപ്പെടാൻ ഒരു പുതിയ പരിപാടിക്കു രൂപം നൽകി. രാമചന്ദ്രൻ ഗൾഫിൽ നിന്നും അവന്റെ അച്ഛന് എഴുതിയത് പോലെ ഒരു വ്യാജക്കത്ത് അയയ്ക്കുന്നു. തന്റെ മുതലാളി ഷെയ്ഖ് അഹമ്മദ് ഖൽത്ത നാട്ടിലെ അർച്ചന മിൽസ് വാങ്ങി നടത്താൻ താല്പര്യപ്പെടുന്നതായും ഉടനെ അതിനുവേണ്ടി നാട്ടിലേക്ക് വരുന്നുണ്ടെന്നും കത്തിൽ എഴുതിയിരുന്നത്. ആ നാട്ടിൽ വലിയ സന്തോഷപ്രദമായ വാർത്തയായി മാറി. അർച്ചന മിൽ ഉടമ അർച്ചന നായരുടെ (സുമൻ രംഗനാഥൻ) ചെവികളിലും ഈ വാർത്ത എത്തി. ട്രേഡ് യൂണിയൻ നേതാവ് ഗോപാലകൃഷ്ണൻ എന്ന ജി കെ (വിജയ രാഘവൻ)യാണ് തൊഴിൽ സമരം പ്രഖ്യാപിച്ച് നീണ്ട ഈ സമരം നടത്തികൊണ്ടുപോകുന്നത്. അയാളുടെ സഹായി രാമൻ പിള്ള (ജഗതി )യാണ് അർച്ചന മിൽസ് സമരത്തിന്റെ മേൽനോട്ടം. മില്ല് തുറന്നു പ്രവർത്തിക്കണമെങ്കിൽ തൊഴിലാളികളുടെ ആവശ്യങ്ങൾ അംഗീകരിക്കണമെന്ന് രാമൻ പിള്ള പറഞ്ഞു. മില്ല് പുനപ്രവർത്തനം ആരംഭിക്കാൻ പോകുന്നു എന്നത് പത്രത്തിൽ വാർത്തയായി പ്രത്യക്ഷപ്പെട്ടു. രാമചന്ദ്രൻ വിസ തട്ടിപ്പിന് ഇരയായി ഗൾഫിൽ പോകാൻ കഴിയാതെ കേരളത്തിലെ മറ്റൊരു നഗരത്തിൽ അടിമക്കണ്ണു (മാമുക്കോയ ) എന്ന ലോട്ടറി കച്ചവടക്കാരന്റെ സഹായിയായി ജോലി ചെയ്യുന്നു. നാട്ടിലെ അർച്ചന മിൽ വീണ്ടും പ്രവർത്തനം ആരംഭിക്കുന്നു എന്ന പത്രവാർത്ത കണ്ട രാമചന്ദ്രൻ നാട്ടിലേയ്ക്ക് പോകാൻ തയ്യാറാകുന്നു. നാട്ടിൽ എല്ലാവരും തന്നെ ഗൾഫുകാരനായിട്ടാണ് കരുതിയിരിക്കുന്നുവെന്നതിനാൽ രാമചന്ദ്രൻ അടിമക്കണ്ണിന്റെ കാറിൽ അടിമക്കണ്ണിനെ ഡ്രൈവർ ആക്കി വലിയ പെട്ടിയും തൂക്കി അനന്തപുരത്ത് വന്നിറങ്ങി.

ഗൾഫിൽ നിന്നും വന്നിറങ്ങിയ രാമചന്ദ്രന് വലിയ സ്വീകരണമാണ് ലഭിച്ചത്. രാമൻ പിള്ള അവനെ അർച്ചനയുടെ അടുക്കൽ കൊണ്ട് പോയി. ഫാക്ടറി ഇയാളുടെ മുതലാളി ഷെയ്ഖ് വാങ്ങുന്നു എന്നതിനാൽ അർച്ചന കമ്പനിയുടെ ഫയൽ അവന് നൽകി. സത്യം അറിയാത്ത രാമചന്ദ്രൻ തനിക്ക് അർച്ചന മില്ലിൽ ജോലി ലഭിക്കാൻ പോകുന്നു എന്ന് കരുതി ഫയൽ സ്വീകരിച്ചു. വഴിയിൽ അവനെ തടഞ്ഞ കടം നൽകിയവർ അർച്ചന മിൽസ് ഫയലുകൾ കണ്ട് മിണ്ടാതെ മടങ്ങി. പിന്നീടാണ് രാമചന്ദ്രന് സത്യം മനസ്സിലായത്. മണിയും ദാസൂട്ടിയുമാണ് ആ കള്ളക്കത്ത് എഴുതിയത് എന്നറിഞ്ഞു അവരോട് എല്ലാം തുറന്നു പറയുന്നു. വിസ തട്ടിപ്പ് കാരണം ഗൾഫിൽ പോകാൻ കഴിയാത്ത രാമചന്ദ്രന്റെ കഥ കേട്ട്, മണിയും ദാസൂട്ടിയും രാമചന്ദ്രനോടൊപ്പം നാട് വിടാൻ തീരുമാനിച്ചു. എന്നാൽ വഴിയിൽ ചില അക്രമികൾ അവരെ ആക്രമിച്ചു ആരാണവർ എന്നോ എന്തിനാണ് ആക്രമിച്ചതെന്നോ മനസ്സിലായില്ല. അവരിൽ നിന്നും രക്ഷപ്പെട്ട് നഗരത്തിൽ എത്തി. രാമചന്ദ്രൻ ഷെയ്ഖ്നെ കൂട്ടികൊണ്ട് വരാൻ പോയതാണെന്ന് അറിഞ്ഞ് രാമൻ പിള്ളയും ചില നാട്ടുകാരും മറ്റൊരു കാറിൽ രാമചന്ദ്രനെ പിന്തുടർന്നു. പിള്ളയും നാട്ടുകാരും തങ്ങളെ പിന്തുടരുന്നത് കണ്ട രാമചന്ദ്രൻ അവരെ വെട്ടിച്ച് കടന്നു കളഞ്ഞു. രാമചന്ദ്രന്റെതാണെന്ന് കരുതി മറ്റൊരു കാറിനെ ലക്ഷ്യമാക്കിയ പിള്ളയും നാട്ടുകാരും ആ കാറിനുള്ളിൽ ഷെയഖ് അഹമ്മദ് ഖൽത്തയെ(സൈനുദ്ദീൻ )കണ്ട് തങ്ങളോടൊപ്പം അനന്തപുരത്തേയ്ക്ക് കൂട്ടികൊണ്ടു പോയി.

നഗരത്തിലെ ഒരു ലോഡ്ജിൽ താമസിച്ചിരുന്ന രാമചന്ദ്രനും ദാസൂട്ടിക്കും ഷെയ്ഖ് ഇപ്പോൾ രാമചന്ദ്രന്റെ വീട്ടിലാണ് താമസമെന്നും നാട്ടിൽ ആകെ ഒരു ഉത്സവ പ്രതീതിയാണെന്നും വാർത്ത കിട്ടി. ഷെയഖ്നെ കാണാൻ നാട്ടിൽ ഏത്തിയ രാമചന്ദ്രൻ ഒന്ന് ഞെട്ടി. രാമചന്ദ്രനെ കണ്ട ഷെയ്ഖ് ഒന്ന് ചിരിച്ചു. ഗൾഫ് വിസക്ക് രാമചന്ദ്രന്റെ കയ്യിൽ നിന്നും കാശ് വാങ്ങി മുങ്ങിയത് ഇവൻ ആണ് അവനെ കളിപ്പിച്ചത് ബോംബെയിലുള്ള മെയിൻ ഏജന്റ്. പണം നൽകിയവരിൽ നിന്നും രക്ഷപ്പെടാൻ അറബി വേഷം കെട്ടി നടക്കുന്നു. ഷെയ്ഖ് ഷെയ്ഖിനെയും കൂട്ടി രാമചന്ദ്രൻ അർച്ചന മിൽസിൽ പോയി ഫാക്ടറി ഒക്കെ കണ്ടു. തൊഴിൽ സമരം ഒത്തു തീർപ്പാക്കാൻ ശ്രമം നടത്തി, പക്ഷെ പരാജയപ്പെട്ടു. ജി കെ ഒരു വിട്ടു വീഴ്ചയ്ക്കും തയ്യാറാകുന്നില്ല. വീണ്ടും ചില അക്രമികൾ ഷെയ്ഖിനെ തല്ലാനും തട്ടിക്കൊണ്ടുപോകാനും ശ്രമിച്ചു. രാമചന്ദ്രൻ, ഇതിന്റെ പിന്നിൽ അർച്ചനയാണെന്ന് സംശയിച്ചു. നേരിട്ട് ചെന്ന് ചോദിച്ചു. അർച്ചനയുടെ മാനേജർ ( കൊല്ലം തുളസി ) സത്യം തുറന്നു പറഞ്ഞു. ജി കെ, അർച്ചനയുടെ അച്ഛന്റെ സുഹൃത്ത് ആയിരുന്നു. കള്ളവും ചതിയും ഉപയോഗിച്ച് കുറെ സ്വത്ത്‌ തട്ടിയെടുത്തു. അർച്ചനയെ വിവാഹം ചെയ്ത് മുഴുവൻ സ്വത്തും കൈക്കലാക്കാൻ ആഗ്രഹിച്ചു. പക്ഷെ അർച്ചനയ്ക്ക് അത് ഇഷ്ടമല്ല അവൾ അവന്റെ പ്രേമാഭ്യർത്തന നിരസിച്ചു. അതുകൊണ്ട് അയാൾ തൊഴിൽ സമരം ഉണ്ടാക്കി. കിട്ടാൻ സാധ്യത ഇല്ലാത്ത ആവശ്യങ്ങൾ മുന്നിൽ വച്ചു. തൊഴിലാളികൾ ഒരു വർഷമായി പട്ടിണിയിലാണ്.

ഇപ്പോൾ രാമചന്ദ്രന് എല്ലാം വ്യക്തമായി മനസ്സിലായി അവൻ ഒരു ഒത്തു തീർപ്പ് മീറ്റിംഗ് വിളിച്ചു കൂട്ടി. മിൽ തുറക്കുമ്പോൾ എല്ലാവർക്കും ജോലിയും സമരകാലത്തെ വേതനത്തിന്റെ അൻപതു ശതമാനം ഉടൻ തന്നെ പണമായി ഷെയ്ഖ് നൽകുമെന്നും ഉറപ്പ് നൽകി. ജി കെ അത് നിരാകരിച്ചു. അപ്പോൾ രാമചന്ദ്രൻ തൊഴിലാളികളെ അവിടെയ്‌ക്ക് വിളിച്ചു വരുത്തി ജി കെ യുടെ കള്ളത്തരം പൊളിച്ചു കാട്ടി. തങ്ങൾക്ക് പറ്റിയ അബദ്ധം തിരിച്ചറിഞ്ഞ തൊഴിലാളികൾ ജോലിയിൽ പ്രവേശിക്കാൻ സന്നദ്ധരായി. തന്റെ കയ്യിൽ പണം ഇല്ലെന്ന് മനസ്സിലാക്കി നാട് വിട്ട് ഓടാൻ തുടങ്ങിയ ഷെയ്ഖിനെ ജി കെ പറഞ്ഞതനുസരിച്ച് പോലീസ് അറസ്റ്റ് ചെയ്തു. പോലീസ് രാമചന്ദ്രന്റെ വീട്ടിൽ നിന്നും ഒരു സൂട്കേസിൽ സൂക്ഷിച്ചിരുന്ന ലക്ഷക്കണക്കിന് രൂപ പിടിച്ചെടുത്തു. തൊഴിലാളികൾക്ക് കൊടുക്കാനുള്ള രൂപയാണെന്ന് രാമചന്ദ്രൻ പറഞ്ഞിട്ടും പോലീസ് വിശ്വസിച്ചില്ല. വിസ തട്ടിപ്പിലെ രൂപയാണെന്ന് പറഞ്ഞ് രാമചന്ദ്രനെ പോലീസ് സ്റ്റേഷനിലേയ്ക്ക് കൊണ്ടുപോയി. വേഷം മാറി നാട്ടുകാരെ വിഡ്ഢി ആക്കിയ ഷെയ്ഖ് അറസ്റ്റ് ചെയ്യപ്പെട്ട് പോലീസ് സ്റ്റേഷനിലുണ്ടായിരുന്നു. ഇതിന്റെ എല്ലാം പിന്നിൽ ജി കെ ആയിരുന്നു എന്നാൽ തക്ക സമയത്ത് അർച്ചന അവിടെ എത്തി ആ രൂപ തന്റെതാണെന്നും തൊഴിലാളികൾക്ക് വിതരണം ചെയ്യാൻ താൻ നൽകിയതാണെന്നും പറഞ്ഞ് രാമചന്ദ്രനെയും ഷെയ്ഖിനെയും പോലീസിൽ നിന്നും മോചിപ്പിച്ചു. ഫാക്ടറി വീണ്ടും പ്രവർത്തനം ആരംഭിക്കാനുള്ള എല്ലാ നടപടിക്രമങ്ങളും രാമചന്ദ്രൻ ചെയ്തു തുടങ്ങി.