തലയണമന്ത്രം

ഒരു കൺസ്ട്രക്ഷൻ കമ്പനിയിൽ സൂപ്പർവൈസറായ സുകുമാരന്റേത് ഭാര്യയും കടയുടമയായ സഹോദരൻ മോഹനനും അമ്മയുമടങ്ങുന്ന ഇടത്തരം കുടുംബമായിരുന്നു.സുകുമാരന്റെ ഭാര്യ കാഞ്ചനയിൽ നിന്ന് വ്യത്യസ്തമായി സമ്പന്ന കുടുംബത്തിൽ നിന്നുള്ള ഒരു ബാങ്ക് ജീവനക്കാരിയായ ഷൈലജയെ മോഹനൻ വിവാഹം ചെയ്യുന്നു.ജോലിയും പണവുമുള്ള ഷൈലജയോട് അസൂയ തോന്നിയ കാഞ്ചന സാവധാനം അനാവശ്യ കാരണങ്ങൾ കണ്ടെത്തി കുടുംബത്തിൽ പ്രശ്നങ്ങളുണ്ടാക്കുന്നു.ഒടുവിൽ കാഞ്ചനയുടെ ആവശ്യപ്രകാരം സുകുമാരൻ അവരുടെ തറവാട് ഉപേക്ഷിച്ച് കാഞ്ചനയ്‌ക്കൊപ്പം വാടകവീട്ടിൽ താമസം തുടങ്ങുന്നു.സമ്പന്നർ താമസിച്ചിരുന്ന ഒരു കോളനിയിലായിരുന്നു അവരുടെ വാടക വീട്.

പുതിയ അയൽക്കാരോട് കാഞ്ചന തന്റെ ഭർത്താവ് ഒരു കൺസ്ട്രക്ഷൻ കമ്പനിയിൽ എഞ്ചിനീയറാണെന്ന് കള്ളം പറയുന്നു. വിലകൂടിയ ഗൃഹോപകരണങ്ങളും കാറും മറ്റുമായി ആഡംബര ജീവിതത്തിനായുള്ള കാര്യങ്ങളൊക്കെയും കാഞ്ചന സുകുമാരനെക്കൊണ്ട് സാധിച്ചെടുത്തു. വരവിൽ കവിഞ്ഞ ചെലവും വായ്പയുമായി സുകുമാരന് വലിയ ബാധ്യതകളുണ്ടായി.സാമ്പത്തികപ്രശ്നങ്ങൾ പരിഹരിക്കുന്നതിനായി സുകുമാരൻ ഒടുവിൽ തന്റെ തൊഴിലുടമയെ വ്യാജരേഖ ചമച്ച് വഞ്ചിക്കാൻ തീരുമാനിക്കുന്നു. അധികാരികൾ ഉടൻ തന്നെ സത്യം മനസ്സിലാക്കുകയും സുകുമാരൻ അറസ്റ്റിലാവുകയും ചെയ്യുന്നു.