എ കെ ലോഹിതദാസ്

A K Lohithadas
Date of Birth: 
ചൊവ്വ, 10 May, 1955
Date of Death: 
Sunday, 28 June, 2009
ലോഹി
എഴുതിയ ഗാനങ്ങൾ: 8
സംഗീതം നല്കിയ ഗാനങ്ങൾ: 1
സംവിധാനം: 11
കഥ: 43
സംഭാഷണം: 47
തിരക്കഥ: 47

1955 മെയ് 10-നു പള്ളുരുത്തിയിലാണ് അമ്പഴത്തിൽ കരുണാകരൻ ലോഹിതദാസ് എന്ന എ കെ ലോഹിതദാസിൻ്റെ ജനനം.  തിരക്കഥാകൃത്തായി മലയാള ചലച്ചിത്രവേദിയിൽ തിളങ്ങിയ ശേഷം സംവിധായക വേഷം അണിഞ്ഞ കഴിവുറ്റ കലാകാരനായിരുന്നു ഇദ്ദേഹം. പത്മരാജൻ, ഭരതൻ, എംടി എന്നിവരെപ്പോലെ കലാമൂല്യമാർന്നതും ജനപ്രിയമായതുമായ കഥാതന്തുക്കൾ കോർത്തിണക്കിയ തിരക്കഥകളാൽ പ്രശസ്തനായിരുന്നു.

ചെറുകഥകൾ എഴുതിത്തുടങ്ങിയെങ്കിലും ”സിന്ധു ശാന്തമായി ഒഴുകുന്നു” എന്ന നാടകത്തിന്റെ രചയിതാവായാണ് പ്രൊഫഷണൽ രംഗത്തേക്ക് കടന്നു വരുന്നത്.ലോഹിയുടെ തന്നെ "ഏകാദശി നോറ്റ കാക്ക" എന്ന കഥയാണ്  "സിന്ധു ശാന്തമായി ഒഴുകുന്നു" എന്ന നാടകമായി മാറ്റിയെടുത്തത്.  ചേർത്തല തപസ്യ നാടകസമിതിയാണ്  ഇത് നാടകമായി വേദികളിൽ അവതരിപ്പിച്ചത്.  1986-ലെ സംസ്ഥാന സർക്കാരിന്റെ മികച്ച നാടകകൃത്തിനുള്ള അവാർഡ് ഈ നാടകത്തിലൂടെ ലോഹിതദാസിന് ലഭിച്ചു.   സിന്ധു ശാന്തമായ് ഉറങ്ങുന്നു, അവസാനം വന്ന അതിഥി, സ്വപ്നം വിതച്ചവർ എന്നിവയാണ് പ്രധാന നാടകങ്ങൾ.

തന്റെ പുതിയ സിനി`മയുടെ തിരക്കഥയിൽ മാറ്റം വരുത്തുവാൻ ലോഹിതദാസിന്റെയടുത്തെത്തുന്ന സിബി മലയിൽ പിന്നീട് ലോഹിതദാസിനെ തന്റെ അടുത്ത സിനിമക്ക് തിരക്കഥയെഴുതുവാൻ ക്ഷണിക്കുകയായിരുന്നു. സിബി മലയിൽ സംവിധാനം ചെയ്ത തനിയാവർത്തനത്തിലൂടെയാണ് ലോഹിതദാസ് സിനിമയിൽ തിരക്കഥാകൃത്തായി മാറുന്നത്. 1987ൽ പുറത്തിറങ്ങിയ തനിയാവർത്തനം, തിരക്കഥാകൃത്തായ ലോഹിതദാസിനെ ആ വർഷത്തെ ഫിലിം ക്രിട്ടിക്സ് അവാർഡിനർഹനാക്കുകയും ഒപ്പം ജനസമ്മിതിയുള്ളൊരു തിരക്കഥാകൃത്താക്കി മാറ്റുകയും ചെയ്തു.  വാടകഗർഭപാത്രം കേന്ദ്രബിന്ദുവായി അവതരിക്കപ്പെട്ട ദശരഥം ആർദ്രമായ ഒരു കഥയാണ് പറഞ്ഞത്. കിരീടം, ഭരതം, ധനം, കമലദളം, ചെങ്കോൽ തുടങ്ങി കുറേ ചിത്രങ്ങൾ ലോഹിതദാസ്-സിബി മലയിൽ കൂട്ടുകെട്ടിൽപ്പിറന്നു. എഴുതാപ്പുറങ്ങൾ, കുടുംബപുരാണം, ജാതകം, മുദ്ര, മഹായാനം, മൃഗയ, മാലയോഗം, രാധാമാധവം, സസ്നേഹം, ഹിസ് ഹൈനസ് അബ്ദുള്ള, ആധാരം, അമരം, വെങ്കലം, വാത്സല്യം, പാഥേയം, തൂവൽക്കൊട്ടാരം, വീണ്ടും ചില വീട്ടുകാര്യങ്ങൾ എന്നിവയാണ് പ്രധാനപ്പെട്ട തിരക്കഥകൾ. ഏകദേശം നാല്പത്തിയൊന്നോളം സിനിമകൾക്ക് തിരക്കഥയെഴുതി.

തിരക്കഥാ രചനയിൽ നിന്ന് സംവിധായകനിലേക്കുള്ള ചുവടുമാറ്റം 1997-ൽ പുറത്തിറങ്ങിയ "ഭൂതക്കണ്ണാടി" എന്ന ചിത്രത്തിലൂടെ ആയിരുന്നു. തുടർന്ന് കാരുണ്യം, ഓർമ്മച്ചെപ്പ്, കന്മദം, അരയന്നങ്ങളുടെ വീട്, ജോക്കർ, സൂത്രധാരൻ, കസ്തൂരിമാൻ, ചക്രം, ചക്കരമുത്ത്, നിവേദ്യം എന്നീ പന്ത്രണ്ടോളം സിനിമകൾ സംവിധാനം ചെയ്തു. കസ്തൂരിമാൻ, നിവേദ്യം, ചക്കരമുത്ത് തുടങ്ങിയ ചിത്രങ്ങളിൽ ഗാനരചയിതാവിന്റെ വേഷവും അണിഞ്ഞു. 18 തവണ മികച്ച തിരക്കഥയ്ക്കുള്ള ഫിലിം ക്രിട്ടിക് അവാർഡ് ലോഹിതദാസിനെ തേടിയെത്തി. നവാഗത സംവിധായകനുള്ള ദേശീയ പുരസ്കാരം, മികച്ച സംവിധായകനുള്ള പത്മരാജൻ പുരസ്കാരം, രാമു കാര്യാട്ട് പുരസ്കാരം, അരവിന്ദൻ പുരസ്കാരം, മികച്ച കഥയ്ക്കുള്ള പത്മരാജൻ പുരസ്കാരം എന്നീ ബഹുമതികൾ നേടിയിട്ടുണ്ട്.തമിഴ്നാട് സർക്കാരിന്റെ സംസ്ഥാന അവാർഡും നേടിയിട്ടുണ്ട്.

ഭാര്യ: സിന്ധു. മക്കൾ: ഹരികൃഷ്ണൻ, വിജയ് ശങ്കർ.

ഹൃദയാഘാതത്തെത്തുടർന്ന് 2009 ജൂൺ 28ന് എറണാകുളത്ത് വെച്ച് ഇദ്ദേഹം നിര്യാതനായി.

ലോഹിതദാസിന്റെ ഇന്റർവ്യൂകളും അദ്ദേഹം സൃഷ്ടിച്ച മികച്ച ചില ചലച്ചിത്രരംഗങ്ങളും കോർത്തിണക്കിയ ഒരു വീഡിയോ..