കൃഷ്ണനും രാധയും

വിദ്യാസമ്പന്നനായ ജോണ്‍ (സന്തോഷ് പണ്ഡിറ്റ്) ഫ്ലെക്സ് ബോര്‍ഡ് ഡിസൈനിങ്ങും മറ്റു ആര്‍ട്ട് വര്‍ക്കുകളും ചെയ്യുന്ന ഒരു കലാകാരന്‍ കൂടിയാണ്. സത്യസന്ധനും നീതിമാനുമായ ജോണ്‍ ജോലിക്കൊപ്പം മ്യൂസിക് ആൽബങ്ങളും ചെയ്യുന്നുണ്ട്. ജോണ്‍ സ്നേഹിക്കുന്ന യുവതിയാണ് ഹിന്ദു മതക്കാരിയായ രാധ. ഇവരുടെ പ്രണയം രാധയുടെ അച്ഛന്‍ അറിയുന്നതോടെ ജോണിനെ കാണുന്നതില്‍ നിന്ന് രാധയെ വിലക്കുന്നു. എങ്കിലും ഇരുവീട്ടുകാരുടേയും എതിര്‍പ്പിനെ വകവെക്കാതെ ഇരുവരും വിവാഹിതരാകുന്നു. വീട്ടുകാരില്‍ നിന്നും ബഹിഷ്കൃതരാകുന്ന ഇരുവരും താമസിക്കാന്‍ ഒരു വീട് അന്വേഷിക്കുന്നു. ജോണിന്റെ സുഹൃത്തിന്റെ സഹായത്താല്‍ അവര്‍ക്ക് വിശ്വാസികളായ ഒരു ഹിന്ദു വിധവയും മകളും മാത്രമുള്ള ഒരു വീട് വാടകക്ക് താമസിക്കാന്‍ കിട്ടുന്നതിനു വേണ്ടി ജോണ്‍, കൃഷ്ണന്‍ എന്ന പേരു മാറ്റി അവിടെ താമസിക്കുന്നു. രാധക്ക് സ്ഥലം കൌണ്‍സിലറുടേ ഓഫീസില്‍ ഒരു ജോലി ലഭിക്കുന്നുവെങ്കിലും കൌണ്‍സിലര്‍ ആയ ജോസഫിന്റെ മോശം പെരുമാറ്റത്തിനു വിധേയയാകേണ്ടി വരികയും ചെയ്യുന്നു. അതോടേ രാധ ആ ജോലി രാജിവെക്കുന്നു. വാടക വീട്ടിലെ പെണ്‍കുട്ടി രുഗ്മിണി കവിതകള്‍ എഴുതുന്ന ശീലമുള്ളത് കൊണ്ട് ഒരു ആല്‍ബത്തിനു വേണ്ടി കൃഷ്ണന്‍ എന്ന ജോണ്‍ അവള്‍ക്ക് ഒരു അവസരം ഒരുക്കിക്കൊടുക്കുന്നു. രുഗ്മിണിയേയും അമ്മയേയും അവിടെ നിന്നിറക്കി സ്വത്ത് കൈക്കലാക്കാന്‍ ശ്രമിക്കുന്ന രുഗ്മിണിയുടേ അമ്മാവന്‍ കൃഷ്ണനേയും രുഗ്മിണിയേയും ചേര്‍ത്ത് അപവാദം പ്രചരിപ്പിക്കുന്നു. ഇതിനിടയില്‍ ജോണിന്റെ അനുജന്‍ ഫൈനാന്‍സ് നടത്തുന്ന ജിമ്മിക്ക് ശത്രുക്കളുടെ ആക്രമണം ഉണ്ടാകുന്നു. അപ്രതീക്ഷിതമായി അവിടെയെത്തിയ ജോണിനു ജിമ്മിയെ രക്ഷിക്കാനുള്ള ശ്രമത്തില്‍ തലക്ക് ക്ഷതമേല്‍ക്കുന്നു. അസുഖം മൂലം വിശ്രമത്തിലായ ജോണിനു മരുന്നു വാങ്ങാന്‍ വേണ്ടി രാത്രിയില്‍ പുറത്തു പോയ രാധ അപ്രത്യക്ഷയാകുന്നു. അതിനെത്തുടര്‍ന്നുള്ള അന്വേഷണത്തില്‍ ജോണ്‍ ഞെട്ടിപ്പിക്കുന്ന ചില കാര്യങ്ങള്‍ അറിയുന്നു. സിനിമാ റിവ്യൂ ഇവിടെ വായിക്കുക.