ചിത്രസൂത്രം

പെറുവിലെ നാസ്ക എന്ന സ്ഥലത്ത് സംഭവിച്ച അദ്ഭുതകരമായ ഒരു പ്രതിഭാസം കേരളത്തിലെ ഒരു ഗ്രാമത്തിലുണ്ടാക്കുന്ന അനുരണനങ്ങളാണ് വിപിൻ വിജയ് ഏറ്റവും പുതിയ സിനിമയായ 'പ്രതിഭാസ'ത്തിൽ ( The Tetrahedron) അവതരിപ്പിക്കുന്നത്. നാസ്കയിൽ പെട്ടെന്നൊരു ദിവസം രണ്ടു നില കെട്ടിടത്തിന്റെ വലുപ്പത്തിൽ ഒരു ത്രികോണ പിരമിഡ് ഭൂമിയിൽനിന്ന് ഉയർന്നു വന്നു. അമ്പരപ്പിക്കുന്ന ആ കാഴ്ച അവിടുത്തെ സാധാരണജീവിതത്തിന്റെ താളം തെറ്റിച്ചു. മിനിറ്റുകൾക്കകം ആ പിരമിഡ് കാണാതാവുകയും ചെയ്തു. എന്നാൽ അതിനിടെ ഈ കാഴ്ചയിൽ പരിഭ്രമിച്ച് അനേകം വാഹനങ്ങൾ ഒന്നിന് പിറകെ ഒന്നായി കൂട്ടിയിടിക്കുകയും അനേകം ആളുകൾക്ക് പരുക്ക് പറ്റുകയും മരണങ്ങൾ സംഭവിക്കുകയും ചെയ്തു. പലരെയും കാണാതായി. ഒരു റേഡിയോ വാർത്തയുടെ രൂപത്തിൽ ഈ സംഭവം ഒരു കേരളീയ ഗ്രാമത്തിൽ എത്തുകയും കേന്ദ്ര കഥാപാത്രമായ മായ അത് കേൾക്കുകയും ചെയ്യുന്നു. യാദൃച്ഛികമെന്ന് പറയട്ടെ, അതേദിവസംതന്നെ അവളുടെ പ്രിയ കൂട്ടുകാരി ദിവ്യയുടെ അച്ഛനെ കാണാതാകുന്നു. ത്രികോണ പിരമിഡ് ഭൂമിയിൽനിന്ന് ഉയർന്നുവരുകയും കാണാതാകുകയും ചെയ്തതുപോലെയുള്ള ഒരു പ്രതിഭാസമാണ് തന്റെ കൂട്ടുകാരിയുടെ അച്ഛന്റെ തിരോധാനമെന്ന് മായ തിരിച്ചറിയുന്നു. മായ നിരന്തരം അന്വേഷണങ്ങളിലാണ്. ഈ ചെറിയ ഭൂമിയിലെ ചെറിയ ജീവിതങ്ങൾ വെറുമൊരു സങ്കല്പംപോലെയാണ് ജീവിക്കുന്നത്. മറ്റാരുടെയോ സ്വപ്നത്തിലെ കാഴ്ചകൾ എന്നതുപോലെ. മായയുടെ അന്വേഷണങ്ങൾ അവളെ അയഥാർഥമെന്നോ ഭാവിയിൽ സംഭവിക്കാനിടയുള്ളതെന്നോ പറയാവുന്ന മറ്റൊരിടത്തെത്തിക്കുന്നു. അവിടെ മായയെപ്പോലെയുള്ള യഥാർഥ മനുഷ്യനോടൊപ്പം സൈബോർഗുകൾ എന്ന് വിളിക്കുന്ന മജ്ജയും മാംസവുമുള്ള യന്ത്രങ്ങളും ജീവിക്കുന്നു. ഒരു പക്ഷേ, നാം തന്നെ മറ്റേതോ ജീവി നിർമിച്ച സൈബോർഗുകൾ അല്ല എന്ന് ഉറപ്പിക്കാനാകുമോ? കഥ പറച്ചിലിനപ്പുറത്ത് ദൃശ്യസാധ്യതകളുടെ മറ്റൊരു ലോകം തുറന്നിടാനാണ് പ്രതിഭാസത്തിലൂടെ വിപിൻ ശ്രമിക്കുന്നത്. സ്പെക്കുലേറ്റീവ് ഫിക്ഷൻ എഴുത്തുകാരിയായ വന്ദന സിങ്ങിന്റെ The tetrahedron എന്ന കഥയിൽനിന്ന് പ്രചോദനമുൾക്കൊണ്ടുകൊണ്ടാണ് പ്രതിഭാസം നിർമിച്ചിരിക്കുന്നത്.